TILEINKAÐ HERRA CLUBDUB
Núna ætlar clubdubgaurinn að vernda íslenskar konur, eða “passa upp á stelpurnar sínar” eins og hann myndi eflaust segja á barnamáli svo ofangreindar stelpur skilji hvað er í gangi. Hann ætlar að passa upp á stelpurnar því brúnir leigubílstjórar ætla að skemma þær. Það væri nefnilega svo leiðinlegt ef allar sætu íslensku stelpurnar væru ónýtar því þá eru þær ekki nammigóðar á bragðið lengur. Ath. Íslenskir (hvítir menn) bannið íslensku (hvítu) konunum ykkar að fara í leigubíla. Segið þeim frekar að svífa heim á bleikum kynbættum fola með grænt tagl sem heitir Sleipnir 2. Ef Sleipnir 2 er upptekinn í kvöld, er bara best að banna skvísunni að fara úr húsi. Þrífðu af þér andlitið babygirl og kveiktu á New Girl, ég ætla niður í bæ að hitta Gumma, Mumma, Elvar, Styrmi, Stefán Elí og Kristó.
Við (stelpurnar hans clubdub) eigum helst að vera heima þangað til hann og hinir strákarnir ná loksins að loka landamærunum! Þeir ætla að flykkjast að strandlínu Íslands standa þétt saman sumir á flókum og aðrir á bomsum. Þannig munu þeir umkringja eyjuna, Styrmir heldur í höndina á Stebba og Stebbi í höndina á Mumma og svo koll af kolli. Komasvo strákar! HÚ! Pössum upp á landamærin! Fyrir utan knúshringinn ríkir lögleysa en fyrir innan hann er sæstustelpuparadís. Hæ hó og jibbí jei og takk takk strákar! <3 <3
Við stelpurnar förum allar niðrí bæ að drekka spritz og tala um sixpakkið á Styrmi eða meiköpp og svo valhoppum við allar heim og kúrum í risastóra stelpurúminu. Kannski förum við í koddaslag ef það liggur vel á okkur. Strákarnir verða eftir við landamærin og geta loksins andað léttar því núna geta engir útlendingar komið og skemmt það sem þeir eiga.
Höfundur er áhugamaður um stelpurnar okkar.
kv Katla Björk Gunnarsdóttir
Innsent 25.4.2025, birt 25.4.2025
Innsent 25.4.2025, birt 25.4.2025