BAKSÝNISSPEGLAR BAUDRILLARD

„Dálítið sem er ekki gott við myndavélar er að þær eru í öðrum lit og áferð en raunveruleikinn.“

Þessi orð lét ég falla í aftursæti bíls sem fenginn var í láni frá frændfólki vinar míns um miðjan febrúar. Bíllinn var af nýjustu gerð og í stað baksýnisspegla voru myndavélar beggja megin við framhurðirnar. Úr þeim streymdi mynd inn á tvo skjái, sitt hvorum megin inni í bílnum, u.þ.b. í beinni línu við myndavélarnar. Apparötin tóku sirka jafn mikið pláss og baksýnisspeglar og myndirnar á skjánum inni í bíl voru ögn úfnar. Málið er að speglar eru einmitt í sama lit og áferð og raunveruleikinn. Sjónræn skynjun er jú ljósskynjun og speglar eru smíðaðir til að varpa ljósi hnökralaust, ef engin dæld eða rispa er til staðar.

Til samanburðar:
Baksýnisspeglar: endurvarp ljósbylgja
Myndavélar + skjáir: ljósbylgjur ferðast inn í linsu, þeim er umbreytt í upplýsingar, 0 og 1 o.þ.h.. Þær eru áframsendar með töfraleiðum á móttöku sem síðan sendir þær inn á völlinn: sjálfan skjáinn.

Ég veit ekki alveg hvað skapendur þessa simulacrum-baksýnisspegla voru að fara en hér eru nokkrar hugmyndir fyrir þá í sama stíl.

Spjaldtölva með frammyndavél fyrir ofan baðherbergisvaskinn.
Klefi inni á heimili sem endurskapar veðrið (hitastig, úrkomu o.s.frv.). Þú stígur inn til að meta aðstæður og finna viðeigandi klæðaburð.
Svipað streymi af því sem er að gerast fyrir utan húsið í stað glugga (hitaveitureikningurinn lækkar en rafmagnsreikningurinn afturámóti hækkar).

Meðfylgjandi er hreyfð mynd af myndatöku á þessari innsetningu.

Mbk,
Hologram-Hekla
Innsent 5.5.2026, birt 6.5.2026

MYNDIR AF SJÓ