FLÖTUR ER TEIGUR
Að búa í húsi. Að búa í húsi sem er líka búð. Að búa í búðarglugga. Að komast vel að orði. Að kosta orð. að selja orð í fyrrnefndri búð. Orð í búðarglugga að selja búðarglugga. Ég hef aldrei farið til tunglsins. Í orðsins fyllstu merkingu. Orð í sinni fyllstu merkingu, orð í orði í orði. Mynd af mynd af mynd af mynd af mynd af mynd af mynd um af myndum af mynd um. Unun af því og öðrum hlutum. Unun af unnum vörum. Unun af ununni einni. Ununin ein og sér. Hvað ef draumar þínir skyldu opinbera sig? Gera sér kleift að birtast ljóslifandi frammi fyrir þér, raungerast. Leyfðu mér að segja þér frá draumi sem mig dreymdi fyrir ekki svo löngu. Draugur fortíðar, maður sem ég hef ekki átt samskipti við í áratug tekur mig á tal, ávítar mig, heldur skammarræðu yfir mér. Maður sem er með stærstu skjalatösku sem þú hefur séð á ævinni, maður sem opnar skjalatöskuna og dregur upp úr henni þrjú stór olíumálverk. Málverk sem í fyrstu virka eðlilega en því lengur sem þú horfir á þau ferðu að sjá andlitið þitt í þeim. Mynd af þér að leggja fyrrnefndan mann í einelti, mynd af þér í margvíslegum stöðum að pynta, ávíta og fífla manninn. þig í ýmsum stöðum, með hnefa á lofti, hann sem píslarvottur, þú þungur á brún með tryllingsglampa í augunum að pynta hann á ýmsa vegu. Fyrst: Hvolfuð skólataska, svo marblettur. Flötur, galdur, teigur. Fé, rúni, félagi við menn. Hvað ef ég mæti með 7-8 gæja heim til þín? Maðurinn sem þú hefur bara hitt einu sinni eða tvisvar áður fer að spyrja þig hvað þér finnist og vill meina að þú sért það versta sem hefur komið fyrir hann. Þú berð fyrir þig minnisleysi en hann segist vera með sönnun í höndunum, í skjalatöskunni, á striganum. Þú brestur í grát.
Ótengd mynd